عد تنازلي
وبدأ العد التنازلي
واتزلزل جوايا حاجه ليك
احساسي اصله غلي
بعد مارخص وهان بعنيك
والصباح مابينا بقا غير متاح
مافجره غاب والعتمه كست البراح
وعشش جوانا الليل بسواده
فبلاش نجني عالحب ونقول حساده
علاقتنا ميزانها كان مايل
كفه بالهوي طبت
والتانيه فراغ من نواحيك
واه من الوجع
لما تحس بالحمل عليك
بتريح جواك المشاعر
وتعيش بسكون
حتي لوكنت شاعر
و حرفك بيها مفتون
بتكون الكلمه جواك
همدانه خملانه
والقلب بين الضلوع مكسوف
دقاته خجلانه
تخاف باسمك تنبض او تحن ليك
الحب اصله هات وخد
ولاكان بس عطاء طول الخط
ده كتر الري يموت الزرعه
وزيه برضه الجفاف عمرها ماطالعه
الحب
خط رايح جاي مش واقف عند معاليك
خط سير مرسوم بحدود قلبين
نفس الدقه نفس النبضه ذات الانين
لو يوم عطلت دقه
ماتستني من التاني دقه
وعلي بابك يرجع يناجي
حاجه ماتت فيك
مش بالوم ولا باوجه اتهام
ولا قلبي ناصب محكمه
شايفك بس في الغرام
جاني وعندي الف مظلمه
حبيت انور الطريق
لو يوم غرامي حلي
لازمك شرح واهتمام
لانه ابتدا العد التنازلي
ما احساسي اصله غلي
بعد مارخص وهان زمان بعنيك
ليست هناك تعليقات:
إرسال تعليق