أبناء ( محو الأمية )
ياأفندية يا بتوع الجامعة والكلية
ماتسخروش من إللى معاهم محو الأمية
مالهم بتوع محو الأمية
ماهو خرج من بيوتهم علما وافنديه
فى ناس قالت العلام شطاره
وناس قالت العلام رزق
وناس قالت العلام هديه
تعالى بينا نرجع لورا شوية
زمان كان فيه عيال تروح المدرسة
بالمريلة وعيال تروح بالجلابية
كان فيه مواساه مش سخريه
زمان كان مدرس الطابور إبن بلد ديمقراطى
مش ديكتاتور شايف كل إللي ف الطابور
ماعملش فرق بين إبن الفلاح واِبن الدكتور
وكانت المعامله مع الكل سواسيه
بس أكيد كان فيه حساسية
لما الواد يشوف إللي جانبه بالمريله
وهو بالجلابيه
وبعد مايخلص الطابور العيال تخش الفصول
ومن هنا تتكرر حاله تانيه مأساويه للجلابيه
التخته الأولنيه لأبو مريله والاخرانيه لأبوجلابيه
بس إللي كان مهون علينا شويه
حضرة الناظر/كمال بيه ناظر مدرستنا الابتدائية
كان صاحب شخصية قوية ومواقف إنسانية
وأهمها إنه مافرقش بين المريله والجلابيه
وده كان رافع من روحنا المعنوية
طبعاََ ده كان زمان فى المدارس الأبتدائيه
ومش كل إللي ف الأبتدائيه راح الأعداديه
فى عيال مكملتش وطلعت لظروف عائلية
وهى دى الناس اللي اخدت محو الأمية
أجتهدوا مع اولادهم وعلموهم
وطلع من بيوتهم دكاترة وافنديه
بقلم/حسن علوش/ شاعر الغلابه
ليست هناك تعليقات:
إرسال تعليق